İpoteka və Kredit Zəmanət Fondu 2025-ci ilin yanvar-sentyabr aylarında 354 milyon manat məbləğində ipoteka krediti verib. Bunun 69 milyon manatını güzəştli ipoteka kreditləri təşkil edir.
Fonddan "KORRUPSİYAXƏBƏR"-ə verilən məlumata görə, ilin əvvəlindən adi ipoteka kreditləri vasitəsilə 2565, güzəştli ipoteka kreditləri ilə isə 816 vətəndaşın və ya ailənin mənzil şəraiti yaxşılaşıb. 2025-ci ildə verilmiş ipoteka kreditlərinin orta məbləği 104800 manat olub.
Şəxsi yığımları yetərli olmayan əhali üçün isə 01 oktyabr 2025-ci il tarixinə Fond tərəfindən 132 milyon manat məbləğində 1423 ipoteka krediti üzrə zəmanət verilib. Bu, vətəndaşların daha aşağı ilkin ödənişlə ipoteka kreditlərindən faydalanmasını təmin edib.
Ümumilikdə indiyə qədər Fondun vəsaiti hesabına 3 milyard 680 milyon manat məbləğində ipoteka krediti verilib və bu, təxminən 56 min ailənin mənzil şəraitinin yaxşılaşdırılmasına imkan yaradıb. İpoteka kreditlərindən faydalananların 67 faizi gənclər və gənc ailələrdir.
"KORRUPSİYAXƏBƏR"
