"KORRUPSİYAXƏBƏR" xəbər verir ki, Masallı rayon Musaküçə kənd sakini Əhədov Rövşən Çapay oğlu redaksiyamızın qaynar xəttinə müraciət edərək ciddi qanun pozuntuları ilə bağlı iddialar səsləndirmişdir. Onun sözlərinə görə, kənd bələdiyyəsinin sədri Eldəniz müəllim tərəfindən kənd yolları baxımsız vəziyyətdə saxlanılır, eyni zamanda bələdiyyə mülkiyyətinə aid torpaq sahələri qanunsuz olaraq ayrı-ayrı şəxslərə verilir və bu hallar guya qazilərə yardım adı altında həyata keçirilir.
Məsələ ilə bağlı redaksiyamız tərəfindən bələdiyyə sədri ilə əlaqə saxlanılmışdır. Qarşı tərəf səsləndirilən iddiaları təkzib edərək onların həqiqətə uyğun olmadığını bildirmişdir.
Lakin qeyd olunan məlumatların ictimai əhəmiyyəti və mümkün hüquq pozuntuları ehtiva etməsi nəzərə alınaraq, redaksiyamız tərəfindən faktların araşdırılması üçün aidiyyəti dövlət orqanlarına rəsmi müraciət hazırlanır. İddiaların doğru olduğu təqdirdə, bu hallar vəzifə səlahiyyətlərindən sui-istifadə və qanunsuz torpaq bölgüsü kimi ciddi hüquqi məsuliyyət yaradan əməllər kimi qiymətləndirilə bilər.
Redaksiyamız məsələni nəzarətdə saxlayır və rəsmi qurumlardan daxil olacaq cavablar əsasında ictimaiyyətə daha geniş və ətraflı məlumat təqdim ediləcəkdir.
Korrupsiyaxəbər bildirir ki, məsələ ilə bağlı bütün iddialar ciddi şəkildə araşdırılmalı və qanun qarşısında hər kəs məsuliyyət daşımalıdır.
"KORRUPSİYAXƏBƏR"
