“Natsionalnaya oborona” jurnalının yazdığına görə, bu hal dünya üçün ciddi nəticələr doğura bilər.
ABŞ-İran gərginliyinin artması fonunda Tehran Hörmüz boğazını bağlamağa hazır olduğunu açıq şəkildə bəyan edib. İranın arsenalında 5000–6000 arasında müxtəlif tipli dəniz minası var ki, bunlar sürətli katerlər, sualtı qayıqlar və hətta helikopterlər vasitəsilə boğaza yerləşdirilə bilər.
Bu barədə yazan “Natsionalnaya oborona” jurnalının analitik məqaləsində deyilir.
Qeyd edilir ki, İran bu yolla neft və qaz tranzitinin əsas arteriyası olan Hörmüz boğazını asanlıqla bloklaya bilər.
Ekspertlərin fikrincə, minatəmizləmə prosesi aylarla vaxt aparacaq. ABŞ-ın bölgədəki tralçı (minatəmizləmə) imkanları məhduddur, mövcud sistemlərin əksəriyyəti isə hələ real döyüş şəraitində sınaqdan keçməyib.
Məqalədə vurğulanır ki, əgər İran mina sahələrinin təmizlənməsinə əngəl olarsa, boğazda gəmiçilik uzun müddət dayana bilər, bu da dünya üzrə neft qiymətlərində kəskin artım və geosiyasi sarsıntılara səbəb ola bilər.
