"KORRUPSİYAXƏBƏR" xəbər verir ki, ölkə başçısının iştirakı ilə 27 sentyabr 2025-ci il tarixində Gəncə şəhərində "BakuBus" MMC-yə məxsus yeni avtobus parkının açılışı həyata keçirilib.
İctimai nəqliyyat infrastrukturunun müasir çağırışlara uyğun təşkili istiqamətində Prezident İlham Əliyevin verdiyi tapşırıqlara uyğun olaraq "AZCON Holding" şirkətlərindən olan "BakuBus" MMC tərəfindən ardıcıl tədbirlər həyata keçirilir. Yalnız paytaxt ərazisində deyil, digər iri şəhərlərdə də bu istiqamətdə mühüm layihələr reallaşdırılır.
Tikintisinə cari ilin fevral ayında başlanmış və 10 hektar ərazidə inşa edilmiş parkda müasir tələblərə cavab verən inzibati bina, yuma, təmir və monitorinq mərkəzləri istismara verilib. Parkın deposunda 300 avtobusun saxlanılması mümkündür.
Yeni parkın istifadəyə verilməsi ilə 280 ədəd müxtəlif tutumlu "Yutong" markalı avtobus Gəncə sakinlərinin xidmətinə təqdim edilib. Avtobuslar "BakuBus" MMC tərəfindən idarə olunmaqla 18 şəhərdaxili və 2 şəhərdənkənar marşrut üzrə hərəkət edir.
Müasir avadanlıqlarla təchiz edilmiş monitorinq mərkəzi avtobusların hərəkətini real vaxt rejimində izləyərək sərnişinlərin təhlükəsiz və fasiləsiz daşınmasını təmin edir. Hər bir sürücü xəttə çıxmazdan əvvəl tibbi müayinədən keçir. Avtobusların təmiz saxlanılması üçün yaradılmış yuma məntəqəsi eyni vaxtda 3 avtobusa xidmət göstərir və proses 4 dəqiqə ərzində başa çatır. Burada ekoloji tələblərə və su ehtiyatlarının qorunmasına xüsusi diqqət yetirilir - istifadə edilən suyun 85 faizi təmizlənərək təkrar istifadəyə yönləndirilir.
Təmir mərkəzində yağlama və çilingər işləri üçün 12, qəza təmiri və boyama işləri üçün isə 9 boks istismara verilib. Açılış Gəncə şəhərinin iqtisadi həyatına da mühüm töhfə verib - 553 nəfəri sürücü, 122 nəfəri inzibati və texniki heyət olmaqla ümumilikdə 675 nəfər daimi işlə təmin edilib.
Bununla yanaşı, Gəncə sakinləri artıq ictimai nəqliyyatda müasir nağdsız ödəniş imkanlarından yararlana bilirlər. Gediş haqqı "CityCard", mobil tətbiq üzərindən QR-kod, bank kartları, eləcə də "Apple Pay" və "Google Pay" vasitəsilə ödənilir.
Bütün bunlar Prezident İlham Əliyevin rəhbərliyi ilə regionlarımızın müasirləşdirilməsi, əhaliyə göstərilən xidmət səviyyəsinin artırılması və ümumilikdə bölgələrimizin sosial-iqtisadi inkişafının davamlılığının təmin edilməsi istiqamətində dövlətimiz tərəfindən atılan addımların bariz göstəricisidir.
KORRUPSİYAXƏBƏR
