Yay fəslinin gəlişi ilə valideynlər övladlarını çimərliklərə, istirahət zonalarına apararaq onlara xoş anlar yaşatmağa çalışırlar. Əlbəttə, uşaqların təbiətlə təmasda olması, açıq havada əylənməsi vacibdir.
Lakin mütəxəssislər qeyd edir ki, bu istirahətin sağlamlığa fəsadla nəticələnməməsi üçün bəzi həyati önəm daşıyan məqamlara xüsusi diqqət yetirilməlidir.
Təəssüf ki, hər yay sosial şəbəkələrdə, xəstəxanalarda, həkimlərin çağırışlarında "günəş şüalarından yanan uşaqlar" haqqında xəbərlər artır. Qolları, ayaqları, kürəyi su toplamaq dərəcəsində yanan körpələr, yandırılmış bir dəridə ağrılar içində çırpınan uşaqlar. Bir çox valideyn düşünür ki, uşağın dərisi bir qədər qaralarsa, bu, sağlamlıq əlamətidir. Əslində isə bu, dəriyə dəyən zərərin ilk göstəricisidir.
Həkimlər bildirirlər ki, uşaqların dərisi böyüklərə nisbətən qat-qat nazik və həssasdır, buna görə də onlar günəş şüalarından daha tez və daha ağır zədələnirlər.
Musavat.com xəbər verir ki, tanınmış pediatr Vaqif Qarayev bununla bağlı valideynlərə çağırış edərək bildirib:
“Uşaqları çimərlikdə yandırmayın. İstirahətə aparırsınız, amma körpələr yanıqla qayıdır. Evdə də əlinizə nə keçir çəkirsiniz yanığa. Diş məcunu, yumurta, bal və s. Yəni soyuducuda nə var hamısını yanığa çəkirsiniz. Olmaz! Həkimə qədər yanıq sahəsinə soyuq kompreslər etmək olar. Pantenol çəkin, amma üstündən sarımayın. Suluqlar varsa, mütləq həkimə müraciət edin. İynə və s. ilə suluğu deşib infeksiyaya şərait yaratmayın”.
Mütəxəssislər qeyd edib ki, xüsusilə günün ən qızmar saatlarında, saat 11:00-dan 17:00-a qədər günəş şüalarının ultrabənövşəyi təsiri maksimum səviyyədə olur:
“Bu saatlarda çimərlikdə günəş vannası qəbul etmək xüsusilə 0-6 yaş arası uşaqlar üçün təhlükəli nəticələr doğura bilər”.
