Redaksiya yazır
Son günlər sosial şəbəkələrdə Bakı şəhərində fəaliyyət göstərən 2 saylı Psixiatriya Xəstəxanası və müəssisənin rəhbərliyi barədə müxtəlif məlumat və iddiaların yayılması diqqət çəkir.
Məsələnin ictimai əhəmiyyətini nəzərə alaraq redaksiyamıza müraciət edən, adının açıqlanmasını istəməyən bir vətəndaş sözügedən məlumatlardan narahat olduğunu bildirib və redaksiyamızdan məsələyə diqqətlə yanaşmağı xahiş edib.
Vətəndaşın müraciətini jurnalist araşdırmasının başlanması üçün əsas götürən redaksiyamız ilk növbədə ən mühüm jurnalist prinsiplərindən birinə — qarşı tərəfin mövqeyinin öyrənilməsinə üstünlük verib.
Bu məqsədlə 2 saylı Psixiatriya Xəstəxanasının rəhbərliyi ilə əlaqə saxlanılıb və sosial şəbəkələrdə müəssisə və onun baş həkimi Leyla Bəsrova haqqında yayılan məlumatlarla bağlı mövqeyi soruşulub.
Xəstəxana rəhbərliyinin redaksiyamıza verdiyi məlumata görə, sosial şəbəkələrdə yayılan bəzi iddialarla bağlı müəssisəyə hər hansı rəsmi jurnalist sorğusu daxil olmayıb. Rəhbərlik həmçinin barəsində yayılan korrupsiya xarakterli iddiaları qəbul etmədiyini və həmin məlumatların həqiqəti əks etdirmədiyini bildirib.
Burada xüsusi olaraq qeyd etmək lazımdır ki, sosial şəbəkələrdə yayılan hər bir məlumat avtomatik olaraq təsdiqlənmiş fakt kimi qəbul edilə bilməz. Xüsusilə konkret şəxslər barəsində korrupsiya və digər hüquqazidd əməllərlə bağlı iddialar irəli sürülürsə, həmin iddiaların mötəbər sənədlərlə, rəsmi araşdırma nəticələri ilə və digər etibarlı mənbələrlə təsdiqlənməsi vacibdir.
Redaksiyamızın hazırkı araşdırması çərçivəsində isə sözügedən iddiaların doğruluğunu təsdiq edən hər hansı rəsmi sənəd və ya səlahiyyətli dövlət qurumunun açıqlaması müəyyən edilməyib.
Redaksiyamıza müraciət edən vətəndaşın söylədiyi digər məqam isə xüsusilə diqqət çəkib.
Onun sözlərinə görə, 2 saylı Psixiatriya Xəstəxanasının əvvəlki vəziyyəti ilə hazırkı vəziyyətini müqayisə etdikdə, müəssisədə müsbət dəyişikliklərin olduğunu müşahidə etmək mümkündür.
Vətəndaş hesab edir ki, bu dəyişikliklərin və müəssisənin hazırkı fəaliyyətinin qiymətləndirilməsi zamanı rəhbərliyin gördüyü işlərin də nəzərə alınması vacibdir və bu baxımdan baş həkim Leyla Bəsrovaya təşəkkür ifadə olunmalıdır.
Əlbəttə, bir vətəndaşın şəxsi müşahidəsi bütün müəssisənin fəaliyyəti barədə yekun nəticə hesab edilə bilməz. Lakin ictimai müzakirələr zamanı yalnız mənfi iddiaların deyil, müsbət fikirlərin də işıqlandırılması obyektiv informasiya mühitinin formalaşması baxımından əhəmiyyətlidir.
Psixiatrik tibb müəssisələrinin fəaliyyəti digər səhiyyə müəssisələrindən bir sıra xüsusiyyətlərinə görə fərqlənir. Burada çalışan həkim və tibb personalının üzərinə həm tibbi, həm də ciddi sosial məsuliyyət düşür.
TƏBİB-in son məlumatlarından da görünür ki, psixi sağlamlıq istiqamətində müxtəlif tədbirlər və layihələr həyata keçirilir. 2 saylı Psixiatriya Xəstəxanasının rəhbər heyəti də psixi sağlamlıq sahəsinə həsr olunmuş tədbirlərdə iştirak edən tibb müəssisələri sırasında göstərilib.
Bu baxımdan belə müəssisələrin fəaliyyəti barədə ictimaiyyətə məlumat verilərkən həm mövcud problemlər, həm də görülən müsbət işlər diqqətdə saxlanmalıdır.
KORRUPSİYAXƏBƏR.com.az və RESPUBLİKAXƏBƏR.AZ olaraq prinsipial mövqeyimiz bundan ibarətdir ki, hər hansı dövlət və ya tibb müəssisəsi haqqında daxil olan məlumatlar araşdırılmadan ictimaiyyətə həqiqət kimi təqdim edilməməlidir.
Eyni zamanda, hansısa vəzifəli şəxs barəsində ciddi ittiham səsləndirilirsə, həmin şəxsin və ya rəhbərlik etdiyi qurumun mövqeyi mütləq öyrənilməlidir.
Bu baxımdan redaksiyamız 2 saylı Psixiatriya Xəstəxanasının rəhbərliyinin mövqeyini də ictimaiyyətə çatdırmağı zəruri hesab edib.
Hazırkı mərhələdə sosial şəbəkələrdə yayılan korrupsiya xarakterli iddialar rəsmi şəkildə təsdiqlənmiş fakt kimi təqdim edilə bilməz. Xəstəxana rəhbərliyi isə həmin məlumatları təkzib edir.
Redaksiyamız bundan sonra da məsələni diqqətdə saxlayacaq, yeni və etibarlı məlumatlar ortaya çıxacağı təqdirdə onların da ictimaiyyətə çatdırılmasını təmin edəcək.
Əsas məqsədimiz hansısa şəxsi müdafiə etmək və ya ittiham etmək deyil, ictimaiyyətə yoxlanılmış, balanslı və obyektiv məlumat təqdim etməkdir.
Sonda Xüsusilə vurğulamaq istəyirik ki, Leyla Bəsrova həmin müəssisəyə rəhbər vəzifəsinə qəfildən təyin edilməyib. O, 20 ilə yaxın müddətdir ki, müxtəlif vəzifələrdə işləyib. Hesab edirik ki, Leyla Bəsrovanı həmin müəssisəyə rəhbər vəzifəsinə təyin edibsə, hər bir halda ona rəhbərlik tərəfindən böyük inam və etibar edilir.
2 saylı Psixiatriya Xəstəxanasının rəhbərliyinə isə mürəkkəb və böyük sosial məsuliyyət tələb edən fəaliyyətində uğurlar arzulayır, müəssisədə xəstələrin müalicəsi və sosial müdafiəsi istiqamətində görülən işlərin bundan sonra da davam etdirilməsinin vacibliyini qeyd edirik.
KORRUPSİYAXƏBƏR.com.az və RESPUBLİKAXƏBƏR.AZ
İnformasiya-Xəbər Portalları
