Baş Şabalıd qazsız qalıb: sakinlər çıxış yolu tələb edir
Uzun illərdir ki, sakinləri ən əsas kommunal problemlərdən biri – təbii qazın olmaması ilə üz-üzədir. Məsələ artıq təkcə məişət çətinliyi deyil, sosial narazılıq doğuran ciddi problemə çevrilib.
"KORRUPSİYAXƏBƏR" in rəhbəri Elyaz Yazan olaraq bildirirəm ki, həm media nümayəndəsi, həm də kənd sakini kimi bu məsələ ilə bağlı mənə davamlı müraciətlər daxil olur. Sakinlər qeyd edirlər ki, illərdir qazlaşdırma ilə bağlı ümidlər olsa da, real nəticə yoxdur.
Mövcud vəziyyət isə kənd əhalisini çətin seçim qarşısında qoyur. Bir tərəfdən meşə ərazilərindən odun tədarükünə ciddi məhdudiyyətlər tətbiq olunur, digər tərəfdən isə alternativ enerji mənbəyi kimi təbii qaz təmin edilmir. Nəticədə insanlar xüsusilə qış aylarında ciddi çətinliklərlə üzləşir.
Sakinlərin sözlərinə görə, dəfələrlə aidiyyəti qurumlara müraciətlər edilsə də, problem hələ də öz həllini tapmayıb. Bu isə haqlı narazılıqların artmasına səbəb olur.
Qeyd olunanları nəzərə alaraq, aidiyyəti qurumları Baş Şabalıd kəndinin qazlaşdırılması məsələsini diqqət mərkəzində saxlamağa və problemin operativ həlli istiqamətində konkret addımlar atmağa çağırırıq. Hesab edirik ki, regionlarda yaşayan vətəndaşların elementar yaşayış şəraiti ilə təmin olunması dövlət siyasətinin əsas prioritetlərindən biri olmalıdır.
Ümid edirik ki, bu məsələ yaxın zamanda öz müsbət həllini tapacaq və kənd sakinləri uzun illərdir gözlədikləri təbii qaz təminatına qovuşacaqlar.
"KORRUPSİYAXƏBƏR"
