Füzulidə uşaq bağçası ilə bağlı ciddi iddialar gündəmdə: şəhid ailəsi üzvü olduğunu bildirən keçmiş işçi danışdı, rəhbərlik isə deyilənləri “şər-böhtan” adlandırdı
Füzuli rayonunun Şükürbəyli kənd uşaq bağçası ilə bağlı “KORRUPSİYAXƏBƏR” İnformasiya-Xəbər Portalının redaksiyasına daxil olan müraciət ciddi suallar doğurur.
Şükürbəyli kənd sakini, bağçada müxtəlif vəzifələrdə çalışdığını bildirən Ağayeva Zülfiyyə Şahin qızı redaksiyamıza müraciət edərək bağçanın fəaliyyəti, işə münasibət, əməkhaqqı ödənişləri və uşaqların qida təminatı ilə bağlı bir sıra ağır iddialar səsləndirib.
Şikayətçi bildirir ki, şəhid ailəsi üzvü olduğuna görə 2021-ci ildən Şükürbəyli kənd uşaq bağçasında işləyib. Onun sözlərinə görə, sonrakı mərhələdə rəhbərlik tərəfindən müxtəlif təzyiqlərlə üzləşib və nəticədə öz ərizəsi ilə işdən çıxmağa məcbur edilib.
Lakin müraciətin ən ciddi hissəsi bununla bitmir.
Ağayeva Zülfiyyə Şahin qızı iddia edir ki, ondan 600 manat pul alınıb.
Şikayətçinin bildirdiyinə görə, həmin pul əməkhaqqının artırılması müqabilində verilib. Lakin gözlənilən əməkhaqqı artımı baş vermədikdən sonra 600 manatın geri qaytarıldığını bildirir.
Burada cavablandırılmalı əsas sual budur:
Əgər 600 manat həqiqətən alınıbsa, bu pul hansı əsasla tələb olunub və hansı məqsədlə götürülüb?
Yox əgər belə bir ödəniş ümumiyyətlə olmayıbsa, o zaman bu iddianı təsdiq və ya təkzib edə biləcək sənədlərin və digər sübutların araşdırılması zəruridir.
Şikayətçinin digər iddiaları isə birbaşa bağçada uşaqların qidalanması ilə bağlıdır.
O, uşaqlar üçün bağçaya gətirilən bəzi qida məhsullarının təyinatı üzrə istifadə edilmədiyini, həmin məhsulların rəhbərliyə aid olduğu bildirilən mağazada satıldığını iddia edir.
Bundan başqa, uşaqlara keyfiyyətsiz və boyanmış çörək verildiyini də bildirir.
Əgər bu iddialar həqiqəti əks etdirirsə, söhbət artıq sadəcə işçi ilə rəhbərlik arasındakı əmək mübahisəsindən getmir.
Söhbət uşaqların qidalanmasından, ərzaq təminatından və dövlət hesabına ayrılan məhsulların təyinatından gedir.
Bu səbəbdən belə məlumatlar mütləq şəkildə sənədlər, uçot məlumatları, satınalma sənədləri, anbar və mətbəx qeydləri, eləcə də digər sübutlar əsasında yoxlanılmalıdır.
Ağayeva daha bir ciddi iddia səsləndirərək, bir neçə ay ərzində ona məxsus əməkhaqqının şəxsən özü tərəfindən deyil, başqa şəxs tərəfindən götürüldüyünü və sonda ona cəmi 112 manat “raşot pulu” verildiyini bildirir.
Bu iddia da sənədlərlə asanlıqla yoxlanıla biləcək məsələlərdəndir.
Əməkhaqqı hansı məbləğdə hesablanıb?
Kim tərəfindən götürülüb?
Hansı sənədə əsasən verilib?
İşçinin imzası varmı?
Pul başqa şəxsə verilibsə, bunun hüquqi əsası nə olub?
Bu sualların cavabı sənədlərdə olmalıdır.
Redaksiyamız jurnalist etikasının və obyektivliyin tələblərinə uyğun olaraq qarşı tərəfin mövqeyini də öyrənib.
Şükürbəyli kənd uşaq bağçasının rəhbərliyi ilə əlaqə saxlanılıb və Ağayeva Zülfiyyə Şahin qızının redaksiyamıza səsləndirdiyi bütün əsas iddialar rəhbərliyin diqqətinə çatdırılıb.
Bağça rəhbərliyi isə səsləndirilən iddiaları qəbul etmədiyini, deyilənlərin həqiqəti əks etdirmədiyini və ittihamların şər-böhtan xarakterli olduğunu bildirib.
Beləliklə, qarşı-qarşıya duran iki mövqe var: bir tərəfdə ciddi ittihamlar səsləndirən keçmiş işçi, digər tərəfdə isə həmin ittihamları tamamilə rədd edən bağça rəhbərliyi.
“KORRUPSİYAXƏBƏR” olaraq hesab edirik ki, belə vəziyyətdə məsələyə münasibət bildirməklə kifayətlənmək olmaz.
Araşdırmaq lazımdır.
600 manat məsələsi sənədlərlə yoxlanılmalıdır.
Ərzaq məhsullarının hara daxil olduğu və hara sərf edildiyi müəyyən edilməlidir.
Uşaqların qidalanması ilə bağlı iddialara faktiki vəziyyət əsasında hüquqi qiymət verilməlidir.
Əməkhaqqı ödənişləri araşdırılmalıdır.
İşçinin işdən azad olunması ilə bağlı sənədlər yoxlanılmalıdır.
Əməkhaqqının başqa şəxs tərəfindən götürülməsi iddiası varsa, bunun hansı əsasla baş verdiyi müəyyənləşdirilməlidir.
Əgər bütün bunlar şikayətçinin iddia etdiyi kimi olubsa, məsələ ciddi hüquqi qiymət tələb edir.
Əgər iddialar əsassızdırsa, bu halda da həmin nəticə rəsmi araşdırma ilə ortaya qoyulmalı və ictimaiyyət məlumatlandırılmalıdır.
Redaksiyamız heç bir şəxsi məhkəmə qərarı olmadan təqsirli elan etmir.
Lakin uşaq bağçası, uşaqların qidalanması, əməkhaqqı və pul tələbi ilə bağlı iddialar səsləndirilibsə, jurnalist olaraq bu məsələlərin üzərindən keçmək də mümkün deyil.
Məhz buna görə redaksiyamız tərəfindən məsələ ilə bağlı aidiyyəti dövlət qurumlarına rəsmi məlumat məktubunun ünvanlanması və səsləndirilən iddiaların araşdırılmasının tələb edilməsi nəzərdə tutulur.
Əsas tələbimiz sadədir:
İddialar araşdırılsın, sənədlər yoxlanılsın, faktlar ortaya qoyulsun və nəticə ictimaiyyətə açıqlansın.
“KORRUPSİYAXƏBƏR” qarşı tərəfin mövqeyini dərc etməyə hazır olduğu kimi, aidiyyəti orqanlara rəsmi məlumat məktubu ünvanlayacaq, aidiyyatı orqanların araşdırmasının nəticəsi barədə ünvanladığı cavab məktubunu olduğu kimi ictimaiyyətə təqdim edəcək.
Çünki bu məsələdə əsas olan kiminsə ittiham edilməsi deyil.
Əsas olan həqiqətin ortaya çıxarılmasıdır.
Qeyd: Yazıda səsləndirilən ittihamlar və iddialar Ağayeva Zülfiyyə Şahin qızının redaksiyamıza verdiyi məlumatlara əsaslanır. Şükürbəyli kənd uşaq bağçasının rəhbərliyi isə bu iddiaları rədd edərək onları şər-böhtan xarakterli adlandırıb. Redaksiya heç bir tərəfin hüquqi təqsirini müəyyən etmir. Məsələyə hüquqi qiymət yalnız səlahiyyətli dövlət qurumlarının araşdırması və qanuni qərarı əsasında verilə bilər.
"KORRUPSİYAXƏBƏR"
